வெளி...!

தேடலின் உச்சத்தில்...
மரித்துப் போன எண்ணங்களால்...
திடமழிந்த உடலோடு..
கட்டற்ற திசையில்..
வெட்டவெளி வாசத்தில்....
நிகழும் என் பயணத்தின்
காலமெற்ற வெளியினில்.....
அது இது என்று...சுட்டியுணரப்படா...
பொருளற்ற பொருளாய்....
பரவிக் கிடந்த கிறக்கத்தை...
வாங்கிக் கொள்ள மனமின்றி.....
கிறக்கத்தில் ...கிறக்கமாகி..
எங்கும் விரவியிருந்த...
என்னின் விஸ்தாரிப்புகளில்
நடந்து கொண்டிருந்தது ஒரு ராஜ்யம்...!

எல்லாமான ஒரு இயக்கத்தில்
எதுவுமற்ற நகர்வுகளில்...
ஊடுருவிக் கிடந்த உணர்வற்ற.....
உணர்வுகளின் மிச்சத்தில்
மொய்த்துக் கிடந்த பிரியங்களில்
ஒளிந்து கிடந்தது....
உடலாய் நான் தேடி அலைந்த....
காதலின் படிமங்கள்....!

சட்டென எல்லாம் கலைத்து...
என்னை இழுத்துப் போட்ட...
பூமியில் அலறிக் கொண்டிருந்த...
அலாரம் அடைத்து...
குளியலறைக்குள் நுழைந்த...
காலையின்அவசரத்தில்...
ஆரம்பித்தது மற்றுமொரு...
நாளின் சராசரி பரபரப்பு.....!

விளக்கம் 1:

எண்ணங்கள் ஒழிந்து நான் என்ற அகங்காரம் ஒடுங்கிய பின்பு உடல் என்பது வெறும் வெற்றுச் சக்கைதான். எல்லாம் கழிந்த நிலையில் உடலென்று ஒன்று இருந்தாலும் ஒன்றுதான் இல்லை என்றாலும் ஒன்றுதான்.

உடலும் எண்ணமுமாகிய மனமும், அவை உதயமாகும் புத்தியும் இல்லாமல் போன பின்பு எஞ்சி இருப்பது ஒர் வித உணர்வு நிலையிலான ஆத்மா. அதன் இயக்கம் காற்றில் பரவும் சப்தம் போல மலரிலிருந்து பரவு மணம் போல, பாய்ந்து பரவும் ஒளி போல எதையெல்லாம் தொடுகிறதோ அதன் இயல்பை உணரும் ஒரு வித அடர்த்தியுடன் இன்னது என்று சுட்டிக் காட்டப்படாத எல்லாவற்றியின் இயல்பாயும் மாறிவிடுகிறது. அதாவது படியும் பொருளில் எல்லாம் அந்த பொருளாயே பரவும் ஒரு தன்மை கொண்ட நுண்ணிய உணர்வாய் ஒரு குளிர் போல ஊடுருவிச் செல்லும் அந்த ஆன்மா.....

எல்லாவற்றின் இயல்புகளையும் ஒருங்கே உணர்ந்து திளைத்து திளைத்து அதில் கிடைத்த சந்தோச கிறக்கத்தை உள் வாங்கி தேக்கி வைத்து உணர மனம் என்றொரு வஸ்து இல்லாமல் வெறும் கிறக்கத்தையே மீண்டும் பரவவிட்டு தன்னில் தானே அனுபவிப்பவன் இன்றி...அனுபமே எஞ்சியிருந்த ஒரு நிலையில் எல்லாமாய் தான் நின்று அங்கிங்கெனாதபடி அனாதியாய் பரவி எல்லா பொருளின் இயக்கத்தில் ததும்பி ஒட்டு மொத்தமாய் ஒரு ராஜங்கத்தை அரங்கேற்றி...இல்லாமல் இருந்து கொண்டிருந்தது.

எல்லாமாய் இருந்த அது அழுத்தமற்ற ஒரு நகர்வாய் மேகம் நகர்வது போல நகர்ந்து எல்லாவற்றிலும் படரந்து செல்லும் போது அந்த ஆத்மா உடலுக்குள் இருந்த போது கற்பனை செய்து வைத்திருந்த அல்லது மறைமுகமாய் உணர்ந்து வைத்திருந்த காதல் எல்லா உயிருக்கும் பொதுவாய், மனிதருக்குள்ளும், மிருங்கங்களுக்குள்ளும், தாவரங்களுக்குள்ளும் இன்ன பிற ஏனைய இயற்கையான எல்லாவற்றுக்குள்ளும் வண்டல் மண் ஆற்றுப் படுகையில் படிந்திருப்பது போல காதல் எல்லா இடத்திலும் மொய்த்துக்க்கொண்டிருந்ததை கண்டு உணரலோடு ஏற்று மறுதலித்தல் இல்லாமல் கடந்து கொண்டிருந்தது.

இப்படியாக உணர்வு நிலையில் எல்லாம் நிகழ்ந்து கொண்டிருக்க...இதை உணர்வுப் பூர்வமாய் உணர்ந்த மானுடனின் நினைவுப்பகுதியில் லெளகீக வாழ்க்கையில் அவன் விடிதலுக்காக வைத்திருந்த அலாரம் அடிக்க சட்டென எல்லாம் கலைத்துப் போட்டு விட்டும் கலைந்து போன சீட்டுக்கட்டாய், உருகிப் போன பனியாய் திடப்பட்ட எண்ணங்கள் மீண்டும் உடலுக்குள் புகுந்து உடலின் பருமனையும் சராசரி வாழ்வின் நிகழ்வுகளையும் நினைவுப்படுத்த...உணர்வு நிலை மறைந்து...அடித்துக் கொண்டிருந்த அலாரம் நிறுத்தி....அன்றைய பரபரப்பு தினத்தின் தயாராதலுக்காக....குளியலறை புகுகிறான் இக்கவி நாயகன்.

அவனுக்குத் தெரியும் லெளகீக வாழ்க்கைக்கு இது எதுவும் உதவாது ஆனால்..உடல் அழியும் ஒரு தினத்தில் இவனின் புரிதல்களிலிருந்து துளிர்க்கும் ஒரு மெய்ஞானம்.

விளக்கம் 2:

நம்மாளு இன்ன பண்ணியிருக்கான்...ஒரு நா நைட் ஸ்லீப்ல டீரிம் அடிச்சு இருக்கான். ரொம்ப பேஜாரான ட்ரீம் அத்து...உடம்பே இல்லாம சும்மா காத்துலயே பறக்குற மாறி ஒரு ட்ரீம்....இன்னா..கேள்வி கேப்பாடு இல்லாம இஸ்டத்துக்கு எல்லா சைட்லயும் சும்மா சுத்தி சுத்தி வந்து ஒரே குஜாலா இருந்து இருக்கான்.......அப்போ ஒரு ஐடியா பண்ணி எல்லா உடம்புக்குள்ளேயும் பூந்து அல்லாரோட பீலிங்கும் எப்டி இருக்குன்னு பாப்பமேன்னு நினைச்சானம்....ட்ரீம் ரொம ஸ்ட்ராங்கா அடிச்சு அடிச்சு எல்லா பொருளுக்குள்ளேயும் பூந்து பூந்து ராஜா மாறி...எல்லா வெள்ளாட்டும் வெளையான்டானம்....

எல்லா உடம்புக்குள்ளேயும் பூந்து பூந்து பாத்தப்ப அவனுக்கு மெய்யாலுமே ஷாக்கா இருந்துச்சாம் ...இன்னான்னா...எல்லா உசுருக்குள்ளேயும், செடி கொடுக்குள்ளேயும், மிருவத்துக்குள்ளேயும் ஒரே லவ்ஸ்தானம்.. ஹ...க் ஹும்....எல்லாத்துக்குள்ளேயும் அன்பு இருந்துச்சாம் அதத்தான் நம்மாளு லவ்வுன்னு பிரிஞ்சுகிட்டானம். எல்லா வேல வெட்டியும் விட்டுட்டு இன்ன இது ட்ரீம்னு நீங்க கூவுறது நல்லா கேக்குதுப்ப...பட் இப்போ இன்ன பிராப்ளம்னா நம்மாளு கொஞ்சம் ட்ரீம் அடிக்கிறதுல்ல எஸ்பர்ட்டு அத்தான் சட்டைய களட்டி போட்றாப்ல உடம்ப தூக்கிப் போட்டுட்டு ஒரே ட்ரிம்ம்மு....

கிர்ர்ர்ர்ர்ர்ர்ர்ர்ன்னு அலாராம் கூவ சொல்ல கபால்னு எழுந்து டைம் பாத்தானம் மணி 7 தாண்டிடுச்சாம்...டகால்னு துண்ட எடுத்து தோள்ள போட்டுடு ட்ரிம தூக்கி கடாசிட்டு பாத்ரூம்குள்ளே பூந்துகிட்டானம் நம்மாளு.....

இன்னா படவா ட்ரீமு...கொய்யாலா வேலக்கி போனாதன் துட்டு..துட்டு இருந்தான் சோறு....! நாளைக்கு சாவுறப்ப பாத்துக்கலாம் நைனா எல்லாத்தையும்.....அதுக்குள்ள ட்ரிமு கீமுன்னு விழுந்திடாதிங்கப்பா.....பேமானி கண்ட கனவுன்னு வேண்ணா டைட்டில் வச்சுக்காலாம்...இன்னா தல நாஞ்சொல்றது....

பின் குறிப்பு:

a) கவிதையில் புரிந்தால் விளக்கம் அவசியம் இல்லை.

b) முதல் விளக்கம் புரிந்தால் இரண்டாவது விளக்கம் தேவையில்லை.

c) இரண்டாவது விளக்கமும் புரியாவிட்டால்....அதற்கு நான் பொறுப்பில்லை


தேவா. S