நினைவுகளோடு....

அழுத்தமாய் நீ கொடுத்துச் சென்ற
முத்தத்தின் அதிர்வுகள் சிதறிக்கிடக்கும்
புத்திக்குள் ஒரு இராட்சசியாய் அமர்ந்து கொண்டு
காதல் மொழி பேசுகிறாய் நீ....
கடைசியாய் நீ பார்த்துச் சென்ற கூர்மையான பார்வையை
மொழி பெயர்க்கும் முயற்சியோடு
பேனாவுக்கும் வெள்ளைக் காகிதத்துக்குமான
இடைவெளியில் உன் நினைவுகளோடு
அலைந்து கொண்டிருக்கிறேன் நான்....!

விடியலைத் துப்பிச் சென்ற இரவொன்று
உயிர் மாற்றி உடல்களுக்குள் புகுத்தி விட்டு
இயல்பாய்தான் அந்த பொழுது விடிந்ததாய்
அழுத்தமாய் சொன்ன பொய்யை....
உன் விழி நீரால் நீ அழித்து அழித்து
என் உயிர் பற்றி நகர்ந்து விட்டாய்
நானோ....
மத யானையாய் அலையும்
ஒரு தீராக் காதலை உயிராய் ஏந்திக் கொண்டு
மெளனமாய் வெற்று வானத்தின் நட்சத்திரங்களை
எண்ணிக் கொண்டிருக்கிறேன்....
உன் நினைவுகளோடு....!

தேவா. S

	Tweet